Килигмир зи рехи хьанвай чIарариз,
Ам я, дустар, зи уьмуьрдин лацувал,
Шад жеда зун эвичIайла багълариз,
Гзаф кIанда заз гатфарин къацувал.

Зи яхцIурни цIемуьжуьд я, гзаф туш,
Адан са пай гьижрандикди фейид я.
Куьне заз гьич кьуьзуьд лугьун инсаф туш,
За зи халкьдин тагьсиб кIевиз хвейид я.

Нурламиш жез уьлкве абад жердавай,
Бахчади хьиз, цуьк ахъайиз уьмуьрди,
РикIин къуват артух жезва къвердавай,
Жегьилна зун Сталинан девирди.

Зи гуьгьуьлар хкажнава цавариз
Кьакьан магьсул авай гегьенш чуьллери.
Килиг садра шад рушариз, сусариз,
Ватандиз мани лугьузва эллери.

Абад Ватандикай кхьенвай мани,
Азад къуш хьиз лув гуз цава къекъвезва.
Хайи Ватан гуьрчег хьана заз кIани,
Гуьгьуьл шад яз, гатфар югъ хьиз хъуьрезва.

Совет властди ганва зи рикIиз экв,
Заз кIанзавач хиве кьаз и кьуьзуьвал.
Герек я халкьдиз зи къелемдин куьмек,
Зи кIанивал язва абрун кIанивал.

Партияди ачухнава чаз майдан,
Ам гегьенш я, къудратлу я, гужлу я.
Хайи халкьдиз, хайи Ватандиз жуван
Югъди-йифди къуллугъиз зун буржлу я.

1953-йис