Кьуьд акъатна, чими гьава галукьна,
Билбилдин хуш аваз ава багълара.
Тарари мад къацу либас алукIна,
Ажеб дамахни наз ава багълара.

Зун багълариз фена шумуд гъилериз,
Юлдашарни галаз жуваз кефериз.
Чи рушарни, сигъал гана кифериз,
Цуькверивди къугъвазава багълара.

Гьар са тарал ала саки тонн ичер,
Аквазмач мад тарал алай гьич пешер.
Рахуналди, тамашналди тух тежер
Ширин суьгьбетни саз ава багълара.

Икьван гуьзел ширин мейва акъудай
Мичуринан рекьиз зун къурбанд хьурай,
Кагьрабайри хьиз яргъалай нур гудай
Ал пIинияр чразава багълара.

Тамашналди вил атIудач ичин(и)хъай,
Шакалатдин дад къведа лап вичихъай.
Хкатдач, дуст, вун чи халкьдин рикIикай,
Ви фикирар ргазава багълара.

Тарар вири са жерге, са форма я,
Машмашни, хват ширинвилиз хурма я,
«Бязи ичер халийрила зурба я», –
Лугьуз, халкьар рахазава багълара.

Кьуьзуь буба, на рикIел хкваш гила,
Багъ авачир са хуьрни амач гила,
Кьегьал агрономриз вун тамаш гила,
ЦIийи багълар кутазва къе дагълара.

1950-53-йисар.