Хьайила гатфар бере,
Ачух хьана дагъ-дере,
Цуьк ахъайна гьар жуьре,
Багъдин иервал вуча!
АтIлас хьтин гуьлчимен
Дагъдин иервал вуча!

Хьана и кардал кьару,
Экуьнин ислягь гару,
Къугъурзавай пад яру
ПIинид иервал вуча!
Я бахтавар, вун авай
Ерид иервал вуча!

Бахтавар я гьарма сад,
Уьлкве азад, эл азад,
Битмиш хьанвай гьар са затI
Чуьлдин иервал вуча!
И бахтавар чуьлдавай
Элдин иервал вуча!

КьечIем са патал алай,
Кьилел яру шал алай,
Чинал чIулав хал алай
Халад иервал вуча!
Къужахдавай цуьк хьтин
Балад иервал вуча!

Бахтлу ксар жеч чалай
Совет гьукумат галай.
Килиг садра чун алай
Постун иервал вуча!
Чаз еке бахтар гайи
Дустун иервал вуча!

Партияди гужлу эл
Гъалибна душманд винел,
Хъуьрезвай гатун гуьзел
Вахтун иервал вуча!
Къвердавай нур гуз авай
Бахтун иервал вуча!

1953-55-йисар.
_______________

Гуьлчимен – инал: цуьквер авай сув