Аршдиз кьадар, тамам ви тIвар
Хкаж хьана тик, Москва.
Яру-цIару ви багълари
Ахъайнава цуьк, Москва.
Авач шегьер валай иер,
Чан Ватандин рикI Москва.
Элдин салам я ваз тамам,
Тахьуй вун эксик, Москва.
Муьжуьд виш сан уьмуьр хъсан
Хьурай ваз тебрик, Москва.

Тебрикдиз лайих я вун,
Къизилдин тарих я вун,
Гзаф хуш къилих я вун,
Душманриз лап ких я вун,
Зегьметчи элдихъ галаз
Алакъадиз сих я вун.

Сих я лугьур кьван,
Кьегьал тир икьван,
Бегьердиз кьакьан,
Михьиз и дуьньядин къене
Гьатна ви тIвар-ван,
Садахъни жеч икьван гегьенш
Заводни фабрик, Москва.

Фабрик завод – рикIин умуд,
Алатдач хьи зи вил валай.
Халкьдин азиз яшайишдиз
Авач хъсан мензил (3) валай.
Гьич садни жеч авайди гьич
Пара гуьмуьш, къизил валай.
Вири крар, агалкьунар,
Себеб хьана эсил валай.
Я вал мягьтел, икьван гуьзел
ГьикI къачуда за гъил валай.

Гъилин къуват я мягькем
Нур хьиз шафакьлу, гуьркем (4),
Гьар са кIвалахдиз уьтквем,
Халкьдин тIалабнар бегьем
Авун паталди вуна
Аквазва гьар серенжем.

(3) Мензил — инал: чка.
(4) Гуьркем — акунар, къамат.

Серенжем гъиле
Кьаз, тухуз кьиле,
Гьулдандин къеле,
Азад тир бине,
Ленинан чIехи
Пайдах кьаз вине,
Алад, алад, я чи мурад
Хьунухь вун вилик, Москва.

Виликди физ гьар сувариз
Парадрихъ ви гьайбат ава.
Мягькем Ватан магълуб тежер
Гъалиб жедай къуват ава.
Ракъини хьиз, нур гуз азиз,
Гьам Ленинан гуьмбет ава.
ГьакI вахъ галаз хъуьтуьл рахаз
Мугьманриз лап гьуьрмет ава.
Чилин рикIе ярум дуьнья
Хьтин зурба къудрат ава.

Ви къудратдин тесниф я,
Йикъалай гуьрчег йиф я,
Мурад гьаниз финиф я.
Къецел хквез гьайиф я,
Эцигайдаз баркалла,
Гзаф зурба ариф я.

Ариф я хейлин,
Камалдиз дерин,
Авурдаз кьилин
Хьурай аферин!
Яшамишрай элдиз багьа
Партия эркин,
Мад авадан жеда гьадан
Кваз регьбервилик Москва.

Регьбервилик кваз гьамиша
Чи девлетар пара хьана.
А вун акваз – душман кьураз,
РикIер патар-патар хьана.
Кьиляй-кьилиз элдин михьиз
Бинел зарбаф (5), хара хьана.
Вал гьужумиз атай кIевиз
Душман уьзуькъара хьана.
Са затI эхир акат тийир
Вакай зурба къеле хьана.

Къеле кIеви гьулдан я,
Культурадин майдан я,
Гьамишалуг уздан (6) я,
Чи законрин мяден я.
Чандилайни лап ширин,
Вун чи дугъма (7) Ватан я.

(5) Зарбаф — къизилдин нурар гудай багьа парча.
(6) Уздан — уьзден, муьт1уыъ тежедайди.
(7) Дугьма — хайи.

Ватан я хъсан,
Муьжуьд виш йисан,
Азад я инсан,
Квачиз са нукьсан,
Хьанва чи уьпкве
Вири ваз хизан,
Дуьнья лап са пад
ХьайитIани, мад
Акатдач вун кIаник, Москва.

ЦIийиз гила кьуна гъиле,
Мадни гуьзел туькIуьрда вун.
Муьгьуьббатдин пияла хьиз
Гьатнава чи фикирда вун.
Михьиз дуьньядиз экв гудай
Фонарь хьтин куькIуьрна вун.
Са къудратлу нур я тамам,
Туьхуьн тийир уьмуьрда вун.
Хушбахт я акур инсанар
Коммунадин (8) девирда вун.

(8) Коммунадин — инал: коммунизмдин.

Девирдин вун мурад я,
Хапкьарихъ авай сад я,
Къудратлувал масад я,
Хушбахт я вун, азад я.
Абад хьунухь мадни вун
Халкьдин чIехи макьсад я.

Макьсад я, гьелбет,
Эй ширин нямет,
Ракъиниз нисбет (9),
Хьана чаз кьисмет.
Вун я чи диде,
Чун я ви килфет.
Язва азад элдин Ватан
Вун гьамишалугъ, Москва.

(9) Нисбет — кутугай, гекъигиз жедай.