АтайтIа куьн Ахцегьарин шегьердиз,
Аквада квез ана са хъсан гьамам.
Иердаказ килиг анин тегьердиз –
Акурла, инсан жеда гьейран, гьамам.

Ава ина гьар жуьредин нумраяр,
Къвезва иниз гьар са хуьряй мугьманар.
Цик пагьайтIа ква хийирлу дарманар,
Я вун халис дердиниз дарман, гьамам.

Гьамамдин яд инсанриз лап хуш жеда,
Регьят хьана, беден бегьем буш жеда,
Кьезил хьана, цавуз фидай къуш жеда,
Багьа я инсанриз вун гьикьван, гьамам.

Къвезва вад йикъан рекьерай сейирдиз,
Килиг ахпа чандиз жедай хийирдиз.
Атайбуру, хъфидайла, эхирдиз
Лугьуда: вун хьурай баркаван, гьамам.

ТуькIуьрнава цементдикай къене пад,
Къецел ийида багьлари ви рикI шад.
Садра атайдаз кIан жеда хквез мад,
Амукьда вич хьана вал гьейран, гьамам.

Анлай гъейри, гзаф кьадар дамах гвай
Эцигнава къерехдал столовай.
Хуьрекрин дад акурлахъди анавай,
ТIуьналди тух жедач гьар инсан, гьамам.

Кефер хьанва Ахцегьарин папариз,
Чуьхуьз чпин чанар, гьахьна латариз.
Пекер чуьхуьз кузвай михьи ятарик –
Ава ина гьахьтин са майдан, гьамам.

Десте-десте, ухшар авай лифериз,
Рушар къведа, гьазур жезвай мехъерик
Герек амукьдач пудраяр хъуькъвериз,
Гьар рушакай ийида жейран, гьамам.

Четин я бес авун вакай рахунар,
Тагьир къваздач садрани вун такуна,
АвачтIани, са вад манат акуна,
Жеда зун ваз гьамиша мугьман, гьамам.