Хъуьтуьл шагьвар галукьиз,
Ян гузавай цуьквери.
Луваривди къвал гатаз
Гьарайзавай кIекери.

Яру хьана цIай хьтин
ЭкъечIна экуьн ярар.
ТIебиатди кIевнавай
Ачухна йифен варар.

ЦIай акьалтай хьиз цифер
Яру хьана сифтедай.
Нур гуз акъатна эквер
Йифен чIулав пердедай.

Вили цавай рагъ виниз
ТIимил хкаж жердавай,
Билбилрин ширин ванер
Ачух хьана къвердавай.

Къацу махпур хьиз хъуьтуьл
Набататрал чиг алай.
Эверзава бубади
Вичин хциз рикI алай.

1945-48-йисар.