Агакьзамаз гатун чими ракъин нур,
КIвалах ргаз жеда чуьлда гургьагур.

Лацу цифер хкаж жеда дагъларай,
Билбилрин ван къведа ширин багъларай.

Къацу чуьллер аквада ваз наз гана,
Дагълариз экъечIда хипер лаз гана.

Агъзур жуьре нагъма ягъиз нуькIвери,
Лепе гузва гьар патахъди никIери.

Ишигълаван жеда ажеб дагъ-тепе,
Къуьлуьн никIи гьар патахъди гуз лепе.

Къабахар хьиз ичер алай винерал
Таран хилер ацукьнава чилерал.

Тух жедач хьи гуьзел чуьлдиз тамашна,
Алатай гад, кIантIа, рикIел хкваш на.

1945-49-йисар.