ЭкъечIна вун сифте яраз
Гваз дамахни наз, беневша.
Амач хъуьтIуьн пехъи аяз,
Девран я гил ваз, беневша.

Гьафтеда садра вун такур
Инсандивай хуьз жеч сабур.
Ша жемир вун икI такабур,
Гардан патал кьаз, беневша.

Кьил винизна, къалура чин,
Ви буйдиз кьий икьван эркин,
РикI алай цуьк чи ашкъидин,
Вун я суьгьбет чаз, беневша.

Гваз атана яран паяр,
Безетмишна къацу тIулар.
Авач садазни ихтияр
А ви хатур хаз, беневша.

Гардан кIирмир вуна икьван,
Азад чуьл я къе ви макан,
Регъуь жемир, азиз мугьман,
Лагь ви метлеб заз, беневша.

Хьанва чалай алем рази,
Гьунарар туш ибур са зи,
ТIебиатни, килиг, кьуьзуь
Табий хьанва ваз, беневша.

1950-53-йисар.