Рагъ алатна, чуьнуьхнава далдади,
Мадни дуьнья кьазва чIулав пердеди.
Ахмиш хьана хквез дагъдай суьруьяр,
Калер ацаз машгъуъ хьанва къарияр.
Лежберрини экуьн къайгъу чIугвазва,
Кьаркьулувар азад цава къугъвазва.
Ничхирри цIивцIивзамачир, ксана,
ЧIулав хьана тарар, тамар, асвана.
Секин я чуьл, сес амачиз хьана лал –
Дагьлар, тамар фена вири ахварал.
Дурнад вил хьиз, алахьнава вили цав,
Кузва гъетер, кьуна цIарцIар, гуз ялав.
ЭкъечIна варз, хкаж хьана кIаса хьиз,
Наз гуз иер агакьнавай суса хьиз.
Зардин кифер гьар патахъди чукIуриз,
Башламишна дере-тепе чIагуриз.
Киснава архашар къацу векь алаз,
Винеп патап курум-курум гьекь алаз.
ГапIал-гапIал чIулав цифер, ара гуз,
Дагъларилай килигзава, къара гуз
Бугъмишна, чуьл хуьзва кIеви кьефесда,
Югъур тийиз, йифен агъур нефесди.
Ширширдин сес къвезва яргъай вацIарин,
Галукьзава нефес экуьн ярарин.

1953-55-йисар.