СтIал Сулейман кечмиш хьайила

Кьве гьиливни гатут кьил-мет:
Кьена халкьдин чIалан устад.
Зегьметчийриз хьана и дерт
Дагъларлайни залан, устад.

Душманриз къаншаба-къаншар
Къвазна кхьей а ви маршар.
КIелиз, вири чи юлдашар
Хьанва шехьиз, пашман, устад.

Дагъларал атана цифер,
ЧIур хьана халкьарин кефер.
Дуьньядилай уна сефер,
Сур хьана ви макан, устад.

Ширин, гуьрчег гафаралди
Зегьмет чIугур йисаралди,
Тапшурмишна фена чалди,
Безетмишна ватан, устад.

Авач ви гьунардиз гиман,
Шаиррин буба Сулейман,
Тамашун я чи эрзиман
Ви хуьруьзни, я чан устад.

Комсомолар, лап чаз мукьва,
Апрелдин дуьз цIуд лагьай къа,
Хуьруьг Тагьир аваз юкьва
Жезва аниз мугьман, устад.

1937-йис