Нянин вахт тир алахьай гуьрчег,
Жуван кIвале зун ацукьнавай тек.
Сада къецелай гана заз эвер,
Ам чи къуншидин гада тир, Аскер.
Лагьана ада: «Эверзава ваз,
Советднн кIвализ ша вун тади кваз.
Атанва гьаниз СтIал Сулейман,
Хаакьдин шаир чаз хьанва къе мугьман.
Ада ракъурна зун ви патавди,
Шаирдиз рахаз кIванзава вавди».
И гафари заз авуна таъсир.
РикIиз кIанзавай акуна шаир.
Къурху къачур хьиз, зурзуна зи рикI,
ГьикI фида, лугьуз, шаирдин вилик.
Теспачавилив къарагъна тадиз,
Фена дуьз хуьруьн советдин кIвализ.
Салам гана за, авуна икрам,
Мугьманрин вилик кьуна жув тIарам.
Гъил кьаз нубатдив, ачух рикIелди
Азиз мугьманриз уна хвашгелди .
Эхирдай сада зи гъил ахъайнач,
«Зи патав ацукь, – лагьана, – юлдаш».
Имни райкомдин секретарь тир чи,
Рахунар секин хьана са гьвечIи.
Сулеймана заз лагьана: «Тагьир,
Фадлай яни вун куь хуьре шаир?»
– Советрин власть хьайила кьулухъ
Шаирвилин рехъ хьанва заз ачух.
– АкI ятIа за ваз гуда кьве суал.
– Жаваб гуниз зун мажбур я гьар-гьал.

Суал
И азадвал вуж я халкьдиз гайиди?
Ам вуж я азадвал кIевиз хвейиди?
Вуч затI я инсандин рикIиз къайиди?
Адакай бес хабар яни ваз, Тагьир?

Жаваб
Ленин я чаз и азадвал гайиди,
Советрин халкь – Ленинан рехъ хвейиди.
Душман я инсандин рикIиз къайиди.
Адакай чаз арха жедач, Сулейман.

Суал
Гьи уьлкве я авайди дуьз гьакъикъат?
Ам вуж я бес дегишайди тIебиат?
Ам гьи вахт я жедайди халкь ферикъат,
Я кин амачирди, я гъараз, Тагьир?

Жаваб
Совет уьлкве я авайди гьакъикъат,
Мичурин я дегишайди тIебиат.
Коммунизмдиз жеда халкьар ферикъат,
Я кин, я гъараз амукьдач, Сулейман.

Суал
Вуч я хуьруьн майишатдин иерди?
Вуч я лув гуз гъиляй-гъилиз къекъверди?
Ам вуч я дуьньяда магълуб тежерди?
Нур гуз акъвазнавай даим чаз, Тагьир?

Жаваб
Колхоз я лап майишатдин иерди,
Соцпайдах я гъиляй-гъилиз къекъверди.
Советрин закон я магълуб тежерди,
Нур гуз къвазнавай, юлдаш Сулейман.

– Гила са нубат заз це на, устад,
Регъуьн виливай вегьиз тIимил гад.
– Нубат гузва ваз регьуьгъ са турба,
Багьа тир гафар харж ая зурба.

Суал
Вуч я халкьдиз виридалай ширинди?
Вуч я гьуьлерлайни гзаф деринди?
Вуч кар я инсандиз гзаф четинди?
Чира элдиз вуна адан тIвар, устад.

Жаваб
Ватан я чаз гьар затIунлай ширинди.
Ам акьул я гьуьлерлайни деринди.
Ахмакь гъавурда тун я лап четинди,
Виридаз чир жен герек и кар, Тагьир.

Суал
Ам гьинай я дуьньядиз къвезвайди экв?
Вуч я машинрилай фидайди зирек?
Ам вуч я чи халкьдиз чарасуз герек?
Адакай це вуна чаз хабар, устад.

Жаваб
Кремль я дуьньядиз гузвайди экв.
Хиял фида машинрилайни зирек,
Ам илим я халкьдиз чарасуз герек,
Амма кьисмет хьанач заз а кар, Тагьир.

Суал
И дуьньяда вуч я халкьдин кIанивал?
Вуч я халкьдин яшайишдин мичIивал?
Ам вуч я инсандин еке кимивал?
Ийидай и гегьенш дуьнья дар, устад?

Жаваб
Ислягьвал я вири халкьдин кIанивал.
Ам дяве я яшайишдин мичIивал.
Савадсузвал я инсандин кимивал.
Сулейманаз яни вун икьрар, Тагьир?

Куьтягь хьана суал-жаваб.
Сулейманан гафуниз яб
Гана чна ширин-ширин
Мана авай гзаф дерин.