ЧIехи шаир, азиз юпдаш, рикIин дуст,
Галамаз вил, дагъдин билбил хьана суст.
Чи азад уьлкведин гуьзел чуьллерал
Ашукь Гьамзат фена ширин ахварал.
Экуьн кьиляй яру, цIару, чиг алай,
Къизилгуьлдин цуькверал ви рикI алай.
Ингье, Гьамзат, кьейилани мад гена
А цуькверин юкьва ава элкъвена.
Къе элдин рикI пашманвилив ацIанва,
Телеграфдин симерал чан атанва,
Гьайиф лугьуз, халкьдин шаир-лауреат,
Элдин вафалу хва, халкьдин депутат.
Акъатна вун, чи жергейра аквазмач,
Азиз Гьамзат, мад вун завди рахазмач.
Гьамзат рикIел алама зи, лап къе хьиз:
ЯхцIурни кьвед лагьай йисан апрелдиз,
АлукIнавай уьлкведи дявед либас,
Кьуьзуьбрукай хкяна чун ирид кас,
Килиг лугьуз, тунай фронтдиз рекье.
Аламатар вуч тир акур чаз еке.
Нальчикдилай анихъ са хейлин яргъаз,
Раханай чун фронтовикрихъ галаз.
Чун фейила а гуьзел Нальчик гьеле
Фашистривай кьаз хьанавачир гъиле.
Акъвазайла машин са дагъдин хурал
Меслят гъанай за зи рикIин дустунал:
«Гьамзат, инлай виниз дагъ я, вун акъваз,
Чун пияда фида, вуч акуртIа чаз –
Вири чна лугьуда ваз хтана,
Вун кьуьзуь я, вучда вуна атана».
Вуна хиве кьуначир а кьуьзуьвал,
Заз акунай ви фикирдин хцивал.
Чалай зирек хкаж хьанай вун дагъдиз,
Ахпа фенай чун са гъвечIи утагъдиз.
Къизбурун ваз вилералди акунай,
Вуна анал Ватандалди кьин кьунай:
– Зун акъваздач, куьнни акъвазмир, дустар,
Дарбадагъ жедалди къанлу фашистар!
Нальчикдин чIехи гостиницад вилик,
Тупун хура къвазна, бомбадин кIаник,
Юлдаш, вуна и гафар чаз лагьанай,
Лагьайвални вуна кьилиз тухванай.
Гьамзат, гьи касди вуна хьиз кIвалахда,
Тарихди ам кьада вичин къужахда.