Садазни темпел паб тахьуй дуьньяда,
ХьайитIа, адан крар энгел жеда.
Пек хъувуна, партал чуьхуьдач ада,
Йифиз кIвале къвалар чухваз, мел жеда.

Хам яцIу жеда гамишдин хев хьтин,
Мурмур ацалтна рахада сев хьтин,
Гагь-гагь экъечIда ви чиниз кьев хьтин,
Гьахьтиндакай ваз бажагьат эл жеда.

Вавай кIанда, кар талакьиз вичелай,
Руг кими жеч адан кIвалин чилелай,
Нагагь са мугьман атайтIа къецелай,
Са сятда кьван а язух кIвачел жеда.

Гагь рахада вавди акъатна ардай,
Гагь рахада къарагъай хьиз азардай.
Каци тIуьна къачур якни базардай,
Хиялиз амукьна, вун мягьтел жеда.

Чин чIурда кIвализ атайла чаради,
Хажалатди вунни адан кьуради,
Калин некни хъвана михьиз данади,
Ви фан къафун истивутни кьел жеда.

КIан хьуналди ваз адавай инсанвал,
Жагъидай туш ужуз, багьа, масанвал,
Нагагь вавай тахьайтIа са хъсанвал,
Гьафтейралди ам вахъ галаз хъел жеда.

Аял туна жеч ам вавай рахкуриз,
РахайтIа вун, башламишда кьацIуриз,
Жеч а кIваляй са затI вавай жагъуриз,
Адан суракь акъатна кимел жеда.

Лугьуналди кьач ада ви насигьат,
Жеч а кIвале са низамни кьениат (20),
Аялрини кьуна адан тIебиат,
Кесибрин жергеда вун эвел жеда.

АтIуй гьахьтин темпел папан хасият,
Вичин чандиз кIусни тагур азият.
Дуьнья вири хьайитIани гьуьрият,
Вич пияда, фу адан къуьрел жеда.

Хуьруьг Тагьир, авуналди гьерекат,
Жедани мад ахьтин кIвале берекат?
Са юкъузни тахьана рикIиз регьят,
Эхир кьведни лап кьецIил чилел жеда.

(20) Кьениат – кьенят.