– Я гъуьл, булушкадиз са чара ая,
Зазни чида: ви къайгьуяр пара я,
Хуьз жедачтIа, ша на зун чара ая,
Са булушка кIанзава хьи заз вавай.

– Я паб, за ваз гьикI къачуда булушка,
АцIанвач зи капративдин книжка,
АцIур тавурдаз гьич гудач спишка,
Буч лагьана кIанзава гил ваз завай.

– Я гъуьл, булушка жедачтIа, шал къачу,
Лугьузвач хьи, за ваз фена кал къачу,
Жедай жафа гьамиша на зал къачу,
Са цIийи шал кIанзава хьи заз вавай.

– Паб рахада булушкадкай, шалдикай,
Хабар кьадач вичин гъуьлуьн гьалдикай,
Са личек алукI ша вуна агъдикай,
И арада вуч кIанзава ваз завай?

– И арада, я гъуьл, вахъ вуч хьанва хьи,
КIвачеллачиз вуна зун лап канва хьи,
Гьавиляй вун къе зи рикIиз къанва хьи,
Са калушар кIанзава хьи заз вавай.

– Я паб, вучиз ийизва на туьгьметар,
Кесиб хьайла, жедайвал я зегьметар,
АтIумир на арадавай гьуьрметар.
Пул авачиз къачуз жезвач ваз завай.

– Я гъуьл, вуч туьгьмет я за ваз авурди?
Зи гафунин акьазвач вун гъавурда,
Пальтодиз гьич чара авач махпурдин,
Гьа и кьуд затI кIанзава хьи заз вавай.

– Я паб, гьикI хьайла регъуь жеда чиниз,
Кепекни пул къвезвач эхир зи гьилиз,
Са виш манат куьне авур буржуниз,
Чара тежез аквазвачни ваз завай.

– Я гъуьл, вуна алачирди сад къалагь (19)
Тесниф хьайиди туш и крар залай,
Уьмуьрда бурж кими хьайид туш валай,
Гьаниз килигна кIанзава заз вавай.

– Я паб, хьана лагьай гафар япариз,
Мус къведатIа яраб акьул папариз,
Кьел ямир на зи лап кайи паквариз,
Заз ни гурай, кIан хьайила ваз завай.

– Ша, гъуьл, вуна ая зи гафар кьабул,
Гьикьван пара аватIани вахъ акьул,
Дувандиз фейтIани жеда вун батIул,
Дувандалди кIанзава хьи заз вавай.

– Мискин Тагьир, хьайитIани ваз такIан,
Маса хце вуна авай са балкIан,
Къачу жуван папазни кIани-такIан,
Жедайди туш а папан сив кьаз вавай.

(19) Къалагь – къалура.

1936-йис.