Куьчеда са паб акуна,
Гъилер даим эчIевайди.
Вирт я лугьуз умудайла,
Шур хьана вич кьичевайди.

Ишара ваз бес я, ариф (15):
Къекъуьнариз зериф-зериф,
Авур кьадар зендер (16) гьайиф,
Рахай гафар, Биче, вавди.

Вил экъуьриз лап кьуд патахъ,
Парталрикни кутаз дамах.
Терсина шал вегьез япахъ (17),
Ашурмаяр (18) хъуьчIевайди.

Тагьира гафар тамамда,
Дуьшуьш хьайи са уламдал
Хасият тийижир хамда
Лугьуда ваз вижевайди.

(15) Ариф – камаллу кас.
(16) Зендер – инал: умудар.
(17) Япахъ – япухъ.
(18) Ашурмаяр – зар бафтаяр.

1953-55-йисар.