На ша лагьай ван япарихъ галукьна,
Жува жувакди фикириз ацукьна.
КIвачел алачиз кьецIила амукьна,
Ви кьилив зун гьикI къведатIа, низ чида.

Инсандихъ дустар жеда, затI авайла,
Ваз хъел къвемир, за и гафар лагьайла.
Инай аниз зегьметдивди атайла,
ГьикI жедатIа, гьикI жедачтIа, низ чида.

Гзаф фагьумар ийизва за завди,
Я стхаяр, гьич бахт кумач чIалак зи.
Къарагъна зун атайла ви патавди,
Къадир жедани-жедачни, низ чида.

Валлагь, дустар, хьанва зи крар жафа,
КIвалах авачиз гьикьван жеда сафа?
ЧIехибурухъ хьана кIандачни вафа?
АватIа ам, авачтIа квехъ, низ чида.

Шумуд сефер лагьана селсоветдиз,
Амни килигдач эсиллагь минетдиз.
Эгер и гьал кхьейтIа за газетдиз,
Яб гудатIа, гудачтIа заз, низ чида.

Мегер тиртIа селсовет вич зи мукьва,
Гьинлай хьайитIани гудай хьи чка.
Аквада са къуллугь ада заз пака,
Лагьана умуд жедатIа, низ чида.

Мискин Тагьир, ая на чIалар тамам,
Къерех ая гьиле авай ви къалам,
Жуван мецелай чIехидаз це салам.
ГьакI авурла, белки, кар кьилиз фида.