Я чан вахар, килиг куьн зи кьуншидиз,
Гьар йикъуз заз аквазвай айвандикай.
Вах я, лугьуз, атана зи къаршидиз,
Дуст кьаз жезмач, валлагь, са инсандикай.

Пул вугана за калушар паталди,
Белки, туьквендиз тахтайтIа гаталди.
Ада, фена, къачуна вич паталди,
ЧIурна икьрар, элячIна виждандилай.

Къачун лагьайла, зун сифте шад хьана,
Вахкуда зав, лугьуз гафар къад хьана,
Къецени къе атана лап гад хьана.
Хкудда за абур адан чандикай.

– Ви гъуьл кIвализ хтанва хьи яргъарай,
Пул гахце зав, чIур тавуна араяр.
Зазни итимди ийизва гьараяр.
ХкудуртIун жува жув и къандикай.

Тагьираз куьн хьана кIанда баришугъ,
Гзаф хьанва куь араяр къаришугъ.
Туш къуншийриз ихьтин крар ярашугъ,
Авачни квехъ са кIус кьван имандикай?