Я стхаяр, такIан паб жедайдалай
Агъзур манат бурж хьайитIа, хъсан я.
Дуьньяда пис кар авани кьиникьлай?
Пис паб жедалди, кьейитIа, хъсан я.

Рахун герек чкадал ам лал жеда,
Гьамишанда кIвале къалмакъал жеда.
Тахсир квачиз, гъуьлуьн чина чIал жеда,
Жедайдалай лап тахьайтIа, хъсан я.

Гъуьл акунмазди адан чин чIур жеда,
Гафуниз гаф элкъуьриз, ваз хур гуда.
Арадавай гьуьрметризни кIур гуда,
Хуьдайдалай рахкурайтIа, хъсан я.

ТIарда ви рикI пис хабар гвай телдилай,
Адан басрух гужлу жеда селдилай.
Жуваз такIан лап гуьрчег гуьзелдилай
РикIиз хуш гачал хьайитIа, хъсан я.

Гунагь жеда, къаргъиш сивяй акъатна,
Бес вучда, дуьз рахадай кьван галатна.
Фикир къведа: рагъул вацIуз аватна,
Гьуьлуьз кьадар лап тухвайтIа, хъсан я.

Тагьира квез лугьузва къе минетдив:
Паб гъунив куьн эгечI чIехи дикъетдив.
Яргьи уьмуьр кечирмиша гьуьрметдив
Эгер квелай алакьайтIа, хъсан я.