Квез лугьудай кьве гаф ава,
Яб це гил заз, хиндедеяр.
Квехъ айибар гзаф ава,
КIандач акваз, хендедеяр.

Ацукьнава куьн кIватI хьана,
Вирибурун гаф сад хьана,
Итимрикай азад хьана,
Кефиз жуваз, хендедеяр.

Ийиз куьне тIимил кIвалах,
Къачуда лап гзаф дамах.
Мад жезамач зун куь чIалахъ,
Куьн я къаммаз, хендедеяр.

Гьикьван ятIани куьн ялгъуз,
Гумрагь жезва йикъалай къуз.
Хъийизамач гьич кьил агъуз,
Кьам цава кьаз, хендедеяр.

Дад гьатнава сиве цIийи,
Алвер ийиз юкъуз-йифиз,
Гьар патахъай абас-шагьи
КIватIиз гъутаз, хендедеяр.

Кьадач папариз эркеквал,
РикI жемир артух кепекрал.
Ишлемишмир куь гуьрчеквал,
Маса гуз наз, хендедеяр.

Кьуьзуьбурун кьацIурда тIвар,
Алакьзамач лугьуз крар.
Амач сиве, гьайиф, сарар,
Гудай квез кIас, хендедеяр.

Жегьилризни яда тегьне
Адетрапди ктIай, кугьне.
Бес хъийидай тушни куьне,
КицIи хьиз кьаз, хендедеяр?

Руш акуртIа физвай гъуьлуьз,
Алахъда бахт адан чIуриз.
Им зиян я вири хуьруьз,
Бес я, акъваз, хендедеяр.

Хуьруьн са пай куьн хьанава,
КIвалера бул тIуьн хьанава,
Итимриз четин хьанава
Квевди рахаз, хендедеяр.

Такабурвал хьана артух,
Паб кьейидан къведач язух.
КIандач, лугьуз, адан дуллух, –
Жеда рахаз, хендедеяр.

Гьарда хуьда тек са аял,
Итим герек амач къвалал
Фида жал и тегьер яргъал –
КичIезва заз, хендедеяр.

Куь кьадар лап жезва пара,
ТIиш туна чарадан чIура,
Гьарда вичиз ийиз чара,
Фидач яргъаз, хендедеяр.

Элкъуьр ийимир гьавайда,
Теклиф атайла субайдан.
Вучиз муьштери ахъайда
Гатай дарваз, хендедеяр.

Текдиз физвай уьмуьр гьайиф,
Дегиш ая куьне синиф
Текдан къуват жеда зайиф,
Акваз-акваз, хендедеяр.

Квез Тагьиран гьич хъел къвемир,
Хъсан-пис, лугьуз, ацукьмир.
Муьштеридилай элкъуьмир
ХъуьтIуьз, яраз, хендедеяр.