Пулдихъ ава ахьтин гьунар
Инсан лап гьейран ийидай,
Са виш манат кIвале авай
Итим лап аслан ийидай.

КIевиз кьада вун кулакди,
Кесибдихъ вун жедач ади.
Са манат патал фяледи
Вичин чан къурбанд ийида.

Бязибуру кIевиз кьуна,
Гьамиша сандухда туна,
Хизан патал харж тавуна,
Миресриз агьсан ийида.

Хабар кьадач чи гьалдикай,
Инжиклу я халкьар вакай
Вун гъиле авай садакай
Михьиз на султан ийида.

Итим хьурай дагъ кьадар сад
Вун тахьайла жедач хьи дад,
Адлай залан дерт авач мад –
Кьакьанбур аскIан ийида.

Бязибуру кIватIна амбар,
Халкьар ийида истисмар,
Гъилел туькьуьл алай къабар
Кесибар талан ийида.

Аквадач хьи вав дуьз рехъ гваз,
Дяведа гужлудан пад кьаз,
Куьмек я вун гьа авайдаз
Гьахъ-батIул дуван ийида.

Адлай гьейри мад са энгел:
ХьайитIа бурж квайди темпел,
Лаш къачуна гваз ви винел
Атана са къал ийида.

Эй бейчара, мискин Тагьир,
КIан жемир ваз пулдин хийир,
Пара хьана эвел-эхир
Ада вун пашман ийида.