Я капративдин чIехибур,
Садазни хабар авачиз,
Амукьнава зи гъвечIибур
Я недай, я хъвар авачиз.

Ахвар – йифиз, кьарай – юкъуз
Амач, чебни хьанва ажуз.
Аялрин гьал хьанва язух,
Шехьзава кьадар авачиз.

Хьайилахъди са кас кесиб,
Вирида ийида айиб.
Хуьз жедач хьи вечрен цицIиб
Вегьидай са твар авачиз.

Дидеди гуз гьарай-эвер,
Аялрихъ гьич амач тегьер.
КIантIа пасукI, кIантIа шекер
Жедач зегьримар авачиз.

Я стхаяр, гьикI ийида,
Фикир гурай пап чIехида.
Кьведни ажалсуз рекьида
Чпихъ са азар авачиз.

Къведач садазни зун рикIел,
Аялар гьалтна зи гъилел.
Агъадач татанмаз кьилел
Садни кьветхверар авачиз.

И гафариз гана фикир,
Кхьей арза отказ мийир.
Инжиклу туш уста Тагьир,
КIандач ихтияр авачиз.