Гьикьван гурай за ви гафариз давам,
Туьгьмет вучиз ийида на, Къистамам?
Руш хъфена, вичиз кIандач лагьана.
Минет вучиз ийизва на, Къистамам?

Ваз кIанзава зунни рушаз юлдашиз,
Руш хкана, ахпа чи кIвал тарашиз.
Зи тIвар хуьре и кардалди угърашиз
КIанзава ваз, гъиле кьуна, Къистамам.

Ви руш хъфейла, чи хизан шад хьана.
Вун Велини Тегъи галаз кIватI хьана,
Ам кьулухъди хкидай меслят хьана.
Заз ви план гил чир хьана, Къистамам.

Хъфей сусан вуч кар ава зи кIвале?
Вучиз хканва ам, кьуна гъил-гъиле?
Инлай виликди тефей крар кьиле
Гил кIанзава кьиле фена, Къистамам.

Ахлад лугьуз рушавди на къал ийиз,
Ваз кIанзава заз са Хуьруьг тIвал ийиз,
КIвале авай жигьизрикай мал ийиз,
Ви фикирар за кьатIана, Къистамам.

Руш себеб кьаз, ийизва на мал тIалаб.
Алатдач жал вун чи чандилай яраб,
Амачни дуьньядин къене гьахъ-гьисаб?
Алат залай вун туькIвена, Къистамам.

Види кьиляй кьилиз чIуру фикир я:
«Гъуьл тахсир туш, ам гьакIан са факъир я,
Руш кIвалерай акъудайди Тагьир я», –
Суван тIулал лугьузва на, Къистамам.

Вуна ахьтин гафар лугьун къелет я,
Гъуьлуьзни папаз герекди гьуьрмет я,
ТахьайтIа ана жедайди гъибет я.
Ви руш туькIвенач, хъфена, Къистамам.

Виликдай хьиз амач гила авамдаз,
Вуна гила фикир хце са хамдаз.
Пуд виш манат рушаз гайи бахчандар
Кеф чIугу гил нез къаткана, Къистамам.

Къистамам — Тагьиран гъвеч1и стха Идрисахъ галаз чара хьайи сусан диде.