Я стхаяр, заз Хъуьлуьдай
Такур са гьунар акуна:
Суткада кьве пут регьведай
Генжедин къванар акуна.

Гъуьр кIан хьайивалди рикIиз,
КIантIа вач вун хъуьтIуьн цикIиз,
Регъвелай са гзаф виниз
ЦIуд метри кьантIар акуна.

Акур инсан жедай мягьтел,
Регъуьн кIаник, гьамни кьилел
Акьалтна сад-садан винел
МуркIадин дагълар акуна.

Регъуьв вугуз тек са-са твар,
Хъсан гъуьриз жедай кьадар.
Мугьманрихъ галаз Хъуьлуьдар
Ажеб хуш рафтар акуна.

Вични тир са хъуьтIуьн къузай,
Бейхабар яз акъатна къай,
Цавуз фена гъуьруьн са пай –
ЦIиницIдин амбар акуна.

Маншаллагь хьи, гьич гаф авач,
Гьикьван элкъвейтIани яваш,
Гъилин регъверлай дирибаш
Элкъуьниз пайгар акуна.

Хъуьлуьдавай Агъарзади
Яб гузмач хьи регъуьз ади,
Хуьруьг Тагьир хъфич мад гьич
Аниз, ихьтин кар акуна.

Шиир шаирди гьакъикъатда вичиз акур кардикай фельетондин жуьреда кхьенвайди я.

1925-30-йисар.