Хуш хьайитIа эгер тIебиат рушан,
Шаксуз, ама адахлудиз кIан жеда.
Анлай гъейри мадни са шумуд лишан
Кваз хьайитIа, адахлудиз кIан жеда.

Рушаз герек жеда гуьзел, хуш жамал
Ва алава кIанда марифат, камал.
Насигьатдиз, лагьай гафариз амал
Ийидайди адахлудиз кIан жеда.

Рахун гуьрчег, кьатIун зирек, мез ширин,
Гъуьлуьн хесет, кIвалин серишта чирин.
«Гьич гаф авач касдин рушаз, аферин», –
Лугьудайди адахлудиз кIан жеда.

Паб я утагъ туькIуьрдайди кIваликай,
Паб я итим ийидайди гъуьлуькай.
Къуьлуьн фу авуна мухан гъуьруькай
Гуз жедайди адахлудиз кIан жеда.

Зи гафариз эгер гайитIа на яб.
Им я, гуьзел руш, ви суалдиз жаваб.
Паб я тухудайди кIвалин гьахъ-гьисаб,
Дуьз тухвайтIа, адахлудиз кIан жеда.