Чан хва, гуьзелдин лишанар я ибур:
Вичин намус хуьз хьайитIа, хъсан я.
Виридалай артух вичел жен абур,
ШартIаривди дуьз хьайитIа, хъсан я.

Алудмир на лагьай гафар рикIелай:
Авахьнавай яргъи чIарар къуьнелай,
Са чIиб кьадар хкаж хьурай чилелай,
Мадни кIус яргъиз хьайитIа, хъсан я.

Нер жен фундух, пIузар – шекер, сив – некьи,
Вилер – мержан, сарар – седеф хьиз михьи,
Гафар – гуьрчег, беден – сагълам, юкь – шуькIуь,
Кашканар гьяркьуьз хьайитIа, хъсан я.

Хуш хасият, гуьзел тIебиат вичин,
Эхирдалди амукьин эвел хьтин.
РикIиз пара чими, лацу кIел хьтин,
Гъилихъди къверид хьайитIа, хъсан я.

Жейранди хьиз гирнагъин затI жакьварла,
Туьтуьнай яд акван герек, ухварла (11)
Ширин-ширин вавди наз гуз рахарла (12),
Милиз-милиз хъуьрез хьайитIа, хъсан я.
Тагьира лугьуда: ацIай кьич хьтин,
Хъуькъвер яру къизил-агьмад ич хьтин,
Жуваз кIанивал а гуьзел вич хьтин,
Вичизни вун кIанид хьайитIа, хъсан я.

1937-йис.

(11) Ухварла – хъвадайла.
(12) Рахарла – рахадайла.