Чан руш, гадад хуш лишанар я ибур:
Вичин намус хуьз хьайитIа, хъсан я,
КIусни герек тежен жегьил такабур,
Адан ният дуьз хьайитIа, хъсан я.

КIвализ итим, хуьруьз кьегьал, вич масан,
Табни гьилле квачир, хесетар хъсан,
Элдихъ галаз уьмуьр тухуз виш йисан,
КIвач-кIвачеваз физ хьайитIа хъсан я.

Кьегьалвални къагьриманвал вичиз хас,
Куьтягьна вуз, я тахьайтIа цIуд класс,
КIевера гьат тавун патал жегьил кас,
Гьар са пеше чиз хьайитIа, хъсан я.

Мез – дилавар, гьилни – жумарт, пел – ачух.
Фагьум-фикир авай вичихъ лап артух,
Са рекьяйни акъваз тийиз гьич кьулухъ,
Акьулдин гвен гуьз хьайитIа, хъсан я.

Ваз ам гуьрчег акуналди винелай,
ЧIалахъ жемир, килиг цIийи кьилелай,
Къванцикайни, къачур хайи чилелай.
Ада бармак куьз хьайитIа, хъсан я.

Начагъ чIавуз герек я жув хуьдайди,
Вун рахкурна тахьуй масад гъидайди.
Ви рикIевай гьар са хиял чидайди
Яз, шадвилер гъиз хьайитIа, хъсан я.

ТуькIвей гъуьлни паб хьайитIа эгена,
Жеда абур гьар са мурад туькIвена,
Хуьруьг Тагьир, ви насигьат куькIвена,
Экуь фонарь хьиз хьайитIа, хъсан я.

1953-55-йисар.