Гьар са юкъуз, гьар са чIавуз
Дегиш я ви гьава, гуьгьуьл.
Къекъвена зун, жагъанач заз,
Вуч ятIа ви дава, гуьгьуьл.

Гагь шад я вун, гагь – перишан,
Гагь серин я, гагь – гуьлуьшан,
Гагь лап зайиф жеда ви чан,
Гагь къугьвада цава, гуьгьуьл.

Гагь чIуру я, гагь вун – къени,
Гагь лацу я, гагь вун – вили,
Гагь арифдин кьада ери,
Гагь жеда вун ява, гуьгьуьл.

Гагь дагъдилай жеда чIехи,
Гагь шуьшедлай жеда михьи,
Гагь цIалцIам я, гагь вун – векъи,
Вахъ гьихьтин сир ава, гуьгьуьл?

1955-58-йисар