Аман, жеди ваз бедназар,
АтIуди вун вили, билбил.
Акур инсан ви агьузар,
Тамам жеда дили, билбил!

Са чар къачу на заз кьилдин,
Кхьихь адрес ви мензилдин.
Чандилайни къизилгуьлдин
Хатур пара кIани билбил.

Дуьньяд винел лугьудай бес
АватIани шумуд нефес,
Галукьайла ви ширин сес,
Гьейран жеда вири, билбил.

Гзаф хьана ашукьар мад:
Лейли – Межнун, Ширин – Фергьад.
АлахънатIан шумудни сад,
Гуз хьанач ви ери, билбил.

Зеррени вак гьич квач леке,
За рикIивай тамашна къе,
Чан гудайди дустун рекье
Хьанач валай гъейри, билбил.

Ужуз-багьа зардин къимет
Саррафриз тек чида, гьелбет.
Зи рикIяй гьич ви муьгьуьббет
Акъатзавач къени, билбил!

Рахадачни вун хупI тIарам,
ШартIаривди вири тамам.
Хуьруьг Тагьиравди сир-гъам
Тавун бес дуьз яни, билбил.

1936-йис.