Кьуьд атана, цIийи кавал алукIна,
ЧIурна салар шахта-къирав галукьна.
Къацу чуьллер гьинва гила гуьлуьшан?!
Яру цуьквер хьана вири перишан.

КьецIиларна тарар, либас хутIунна,
Элдик хкат тийир къайгъу кутуна.
Чукурна нехирар гзаф яргъариз,
Кутуна майданар чIулав чIагъариз.

Дерин кIамар ацIурнава цифери,
Чуьллер вири кьунва михьиз живери.
Нери муркIуцI кьуна, гьвечIи аялар
Авадариз физва хушдиз алерар.

Гьуьжетариз сад-масадахъ галукьна,
Шумудни сад тарсахъди (10) физ алукьна.
Аялри чин чIурна, лагьана: «Къацу
Гатфар къведа – жемир акьван вун яцIу».

1925-30-йисар.

(10) Тарсахъди – далудихъди.