Ан гьикI хьана, кумач хьи вак,
Жегьилвилин ягь, кьуьзуьвал.
Эхир, вуна гуьзел рангар,
Дегишарна агь, кьуьзуьвал.

Халкь паталди на дуьньяда,
Рекьин тийир тIвар тунатIа,
Хабар кьуртIа вавай сада.
Вуч лугьуда, лагь, кьуьзуьвал.

Магьут чухва алай къацу,
Жегьил тир вун туп хьиз яцIу,
ЧIулав чIарар хьана лацу,
Тушни хупI русвагь, кьуьзуьвал.

АлукIдайди хез (21) хьайитIан,
Сивяй гевгьер къвез хьайитIан.
Сусаз, рушаз, нез (22) хьайитIан
Жеда вун икрагь, кьуьзуьвал.

Им я ваз ийизвай тIалаб:
Артух заз мад гумир азаб,
Вахчуна ажалдин шараб,
Захъ галаз гелягь, кьуьзуьвал.

Мад зун кIусни амач кIеве,
ЦIийи сарар хьанва сиве.
Хуьруьг Тагьира вун хиве
Кьадач эсиллагь, кьуьзуьвал.

(21) Хез – хаз, хаздин хамункай квенвай партал.
(22) Нез – низ.