Недайла хупI тушни регьят,
Вун кьуьзуьдан чан я, хешил.
Зи рикIелай фидач ви дад –
Гьакьван рикIиз кIан я хешил.

Вун дуьгуьдин ашдихъ за гуч –
Сагьди жез элба-эл (23) нахуш.
Са хуьрекни жеч вун хьиз нуш,
Лап рикIин дарман я хешил.

Акурла вун авай чанах,
Къачуз кьуьзуь чанди дамах,
Герек жедач чичIек, сумах,
Шурвадлай хъсан я хешил.

Яргъал къвазар ийин къари,
Сусав жен ихтияр вири,
Винел, цуьк хьиз, калин гъери
Хьунухь эрзиман я, хешил.

ХьайитIа сил квачир михьи
Сарубугъдад гъуьрни дуьгуь,
Хъсан чIугвада вун рикIи,
Вун зи дин-иман я, хешил.

Дулма, пити, къавурма куьк,
ХинкIал, хапIа, гена шашлик –
Вири кьулухъ туна, вилик
Акат, ви майдан я, хешил!

Сухвар герек жедач жакьвар,
Идач артух руфун дакIвар,
Алатайла гьафтедин къар,
Ша вун заз мугьман я, хешил.

(23) Элба-эл – гьиляй-гъилиз, гьасятдач.

1925-30-йисар.