Ахъайда за ваз, Муса,
Хьана ихьтин са кьиса:
Куьгьне тенбекдин киса
Хкатна хинкIалдикай.

Вичикни квай гзаф кьел,
Садлагьана кIан винел
Хьана, са шаламдин хел
Хкатна хинкIалдикай.

Гзаф чIехи тир чанах –
Бязибур жедач чIалахъ,
Са афтафа кIуф патахъ
Хкатна хинкIалдикай.

Са тIур вегьейлахъди мад,
ТIурунихъ галаз са затI –
Куьгьне, ктIай цIилин кьатI
Хкатна хинкIалдикай.

Идахъ галаз мад са пек,
Амачир куьниз герек –
Куьгьне са шалвардин кек
Хкатна хинкIалдикай.

Хьанвай йисалайни хал
Аваз кIвале къалмакъал,
Квахьнавай гьа папан шал
Хкатна хинкIалдикай.