Я стхаяр, килигайла,
ГьакIан алциф яд я эрекь.
Дуьз лагьайтIа, хъунин къене
Гзаф туькьуьл затI я эрекь.

Дуьньядава гзаф затIар –
Бирибуру кьада ви тIвар.
Чир авуна вичин кьадар
ХъвайитIа, зун шад я, эрекь.

Рекьяй акъатун са инсан,
Гьелбет хьи, ам туш ви нукьсан.
Инсанрин лап писни хъсан
Чируниз устад я эрекь.

Яр-дуст галаз яргъал-мукьвал,
Гьар затI аваз паргар жен кIвал,
ГьакI хьайитIа, са-кьве бокал
Хъунухъ зи мурад я эрекь.

Духтурривай дарман тежер,
Гагь-гагь артух жеда ви шер.
Хуьруьг Тагьир, гъафил межер,
Вун гьахьтин муртад я, эрекь.

1945-49-йисар.