Мурад я вун ачух хьунухь,
Гьар са нямет алаз, суфра.
Ацукьналди жедач хьи тух,
Ярар-дустар галаз, суфра.

Чими хуьрек тIапIахъанди
Тарелкайриз кьилди-кьилди
Акъудайла, хуш атирди
Тада рикIив къугъваз, суфра.

Шарабдин къаб алаз къвалал,
Тамадади мукьвал-мукьвал
Гъиле турла ацIай бокал,
КIан жеда хуш рахаз, суфра.

Кечирмишиз суьгьбетар хуш,
Неъ, юлдашар, хьурай квез нуш,
Вахъ галаз гьич хъел жедайд туш
Чуьнгуьрдин сим, аваз, суфра.

ТуькIуьрнавачни хупI гуьзел,
Зеррени вак квач хьи энгел,
Икьван жумарт сагьибдин пел
Даим хьурай ахъаз, суфра.

Ви мугьманар авур теклиф
Кьегьалар я, чебни ариф,
Ийизва хьи за ви тариф
ХъуьтIуьз, гатуз, яраз, суфра.

Алач инал гьич шак, гиман,
Кьуьзуь шаир, фикир жаван,
Лап рикIивай хьана мугьман
Хуьруьг Тагьир къе ваз, суфра.