Совет гьукуматди гуьзел и къара
Акъуднава цIийи закон мад, вахар.
Куьн са гзаф жуьрба-жуьр четинвилин
КIвалахрикай авунва азад, вахар.

Виликди хьухь, кьулухъ акъвазмир, папар,
Алуднава куь винелай залан пар.
Авунва итимрихъ галаз барабар,
Ихтиярар хьанва гила сад, вахар.

Пул патал бубади гудай такIандаз,
Гила хуьх куь ихтиярар масандиз.
Сифте кьиляй фикир гана хъсандиз,
Жуван рикIиз кIанидаз алад, вахар.

Кар бушдиз кьун кьегьалвилин лишан туш,
Жуван хийир тийижирди инсан туш.
Кьвед-пуд сефер эвлемиш хьун хъсан туш,
БатIул патаз жеда гьахълу суд, вахар.

Ша ракъиник, мад акъвазмир куьлгведа,
Чи метлебар, вахар, гзаф екеда.
Коммунизма гьич рас жедач уьлкведа,
АмукьайтIа сад кьван бейсавад, вахар.

Чи партиди массовый кIвалах тухуз,
Мягькем авурдалай кьулухъди колхоз,
Хкаж жезва майишатни гьар йикъуз,
Уьлкве тамам жезава абад, вахар.

Инлай виликди авай кьван ялгъузар,
ГъвечIи аялрикай хьанвай чеб бизар,
Гьанизни са план авуна дуьзар,
Куьнни къвалал тадач гила тек, вахар.

Къуллугъдаллай аял хайи папариз
Пуд-кьуд вацран муьгьлет ава ял ягъиз.
Ви чкадал жедач масад кьуна гъиз,
Ви пул пул я – чир хьун я герек, вахар.

Аялар хуьх куьне гуьзел цуькведлай,
Къуллугъчияр хуьзва михьиз шуьшедлай,
Алакьай кар туш им диде-бубадлай,
Алатна йиф, къарагъ, хьанва экв, вахар.