Октябрдин инкъилабди
Нурар яна ваз, Дагъустан.
Амма бязи хаинариз
КIандай кьулухъ таз, Дагьустан.

Лугьун гила за ваз са-сад
Гафар ширин, амал фасад
Ви гуьгъуьна шумудни сад
Гьатна, виниз кьаз, Дагъустан.

Душманриз кIан хьана бязи,
Гьикьван авачтIан ви изин,
Вакай авуна хьиз резин,
Гьар патахъ чIугваз, Дагъустан.

Туна халкьар мичIивиле,
Кьаз кIан хьана вичиз гъиле,
Са патахъай Врангеле
Лугьуз хьана: «Заз Дагъустан!»

Деникина, кьаз ялавни,
Кьуна ингилис къвалавни,
Лугьуз хьана: «Гьич садавни
Гудач, зун амаз, Дагъустан!»

Бичерахова ийиз женг,
«Зун я, – лугьуз, – дагъдин пеленг»,
Хьана тамам чи япар денг,
Гатар кьван дарваз, Дагъустан.

Гоцинскиди гъиз делил:
«Николайни амача гил,
Мирес тир чахъ галаз Шамил,
Къведа зи патаз Дагьустан».

«Зун я, – лугьуз, – адан чара», –
Хутаз кIандай мад вун фура.
Пуд йисуз абурун хура
Акъвазна зурбаз Дагъустан.

Игит я вун, алачиз шак,
Хьана вакай гьулдандин хак.
Душманривай са зерре вак
Хьанач кIир кутаз, Дагъустан.

Серенжемар чи партидин
Халкьари авуна кьилин,
Агакьна чав азадвилин
Муштулухар гваз, Дагъустан.

Акурла чахъ авай гьунар,
Кьурана лап беглер-ханар.
Катна абур – ширин чанар –
Къулухъди элкъвез, Дагъустан.