ХъуьтIуьз гана за ваз нагъвар,
Авачир захъ тегьер, ябу;
Къурух хьанач, ядай са пар,
Гудайвал ваз векьер, ябу.

Ава чаз ви пара язух,
Я вун хизандилай артух,
АвайтIа захъ са рипе мух,
Гудай за ваз эгер, ябу.

Вахъ ганва за еке къимат:
Са яц, са лам, цIувад манат.
Ая вуна нагъвар кьенят,
Куткун санал уьнер ябу!

ЦIай акатрай кесибвилик –
Авуна ви далу кIаник.
Акат тавуртIа вун тIуьник,
Гьинизда и зерер, ябу?

Хьана даим вун кирида,
Са чIарни амач фирида,
Каш гана хьи ваз вирида,
Ачух садра вилер, ябу.

Экъисна ви тарсан кIараб,
Ви азар вуч ятIа яраб?
Хьайила вун икьван хараб,
Ядачни заз эсер, ябу?!

Вегьемир на агъуз япар,
Икьван ажузвал туш са кар.
ХьайитIа кицIериз хабар,
Ийида хьи мехъер, ябу.

Я чан ябу, мийир фикир,
Ви иес я Хуьруьг Тагьир.
Вун кьейила, атIуд эхир
Чи хизандин бегьер, ябу.

1920-25-йисар.

________________

Уьнер – недай.